Davvi-Norgga kulturšiehtadus

Nordlándda fylkkasuohkan ja Romssa ja Finnmárkku fylkkagielda leat jagi 1991 rájes ovttasbargan oktasaš áŋgiruššamiin kultuvrra beales Davvi-Norgga kulturšiehtadusa bokte.

Almmuhuvvon 25.01.2022 15.13
Maŋemusat rievdaduvvon 16.10.2024 14.54

Nordlándda fylkkasuohkan ja Romssa ja Finnmárkku fylkkagielda leat ovttasráđiid áŋgiruššan kultuvrrain guhkes áiggi. Dan ovttasbarggu vuođđun lea leamaš sierra šiehtadus mii vuosttas gearddi vuolláičállojuvvui jagi 1991. Šiehtadus lea viiddiduvvon ja ođasmahttojuvvon máŋgii, maŋimusat jagi 2021.  

Šiehtadusa ulbmil lea ain eambbo ovddidit Davvi-Norgga kulturovttasbarggu.

Davvi-Norgga kulturšiehtadus

Davvi-Norgga kulturšiehtadus lea guovdilis gaskaoapmi ovttasbarggu ja oktasaš ulbmiliid várás sihke kulturpolitihkkii ja kultureallima gárgedeapmái. Kulturšiehtadusas leat guokte oasi: 

  • Politihkalaš, strategalaš oassi, mas leat višuvnnat, juksanmearri ja áŋgiruššamat davvinorgalaš kulturovttasbargui.  
  • Ruhtadeami oassi, mii ásahallá guvllolaš doarjagiid juohkima riikkaoasi viidosaš kulturinstitušuvnnaide ja dáiddárorganisašuvnnaide.  

Institušuvnnat ja organisašuvnnat galget ollašuhttit prinsihpaid ja eavttuid riikkaoasi viidosaš rolla, dáiddalaš kvaliteahta ja eará oassádalliiguin ovttasdoaibmama bokte guvllolaččat. Šiehtadus addá institušuvnnaide einnostahttivuođa, mii lea dárbbašlaš go galget hukset fágabirrasa, gealbbu ja infrastruktuvrra. 

Šiehtadus ođasmahttojuvvo juohke njealját jagi. Dálá kulturšiehtadus bođii fápmui ođđajagimánu 1. beaivvi 2022.  

Loga Davvi-Norgga kulturšiehtadusa 2022-2025 dáppe (PDF, 12 MB)  

Davvi-Norgga girjjálašvuođastretgiija 2022-2025 mearriduvvui fylkkadikkis juovlamánus 2021, ja lea oassi kulturšiehtadusas. 

Davvi-Norgga riikkaoasseráđđi kultuvrra várás  

Riikkaoasseráđđi kultuvrra várás oktiiheiveha fylkkagielddaid gaskasaš kulturpolitihkalaš ovttasbarggu. Riikkaoasseráđđi ásahuvvui jagi 2010, ja das leat mielde iešguhtege fylkka politihkalaš ovddasvástideaddjit.   

Riikkaoasseráđđi galgá mearridit beaiveortnega kulturpolitihkalaš áššiide mat leat deaŧalaččat riikkaoassái, muhto das lea maiddái riikkaviidosaš ja riikkaidgaskasaš mearkkašupmi.  

Riikkaoasseráđđi galgá ságaškuššat oktasaš kulturpolitihkalaš hástalusain, doibmiibidjat oktasaš strategiijaid ja gárgedanprošeavttaid, leahkit oinnolaš guvllolaš, riikkaviidosaš ja riikkaidgaskasaš arenain, ja dahkat álgagiid jeavddalaš oktavuođaide Sámedikkiin ja Kulturdepartemeanttain oktan vuolit direktoráhtaiguin.  

Riikkaoasseráđđi galgá jahkásaččat guorahallat kulturšiehtadusa ja leahkit aktiiva oamasteaddji ja ovddasduvdi riikkaoasi kulturinstitušuvnnaid gárgedeapmái.  

Riikkaoasseráđđi galgá doallat jotkkolaš dialoga kultureallimiin, ja doallat čoahkkimiid ja fágasemináraiud dárbbu mielde, áinnas riikkaoasi dáláš lágidemiid oktavuođas. 

Doarjagat dáidda- ja kulturinstitušuvnnaide 2022–2025 

Fylkkagielddat ovttasbarget ruhtadit máŋga davvinorgalaš dáidda- ja kulturinstitušuvnna Davvi-Norgga kulturšiehtadusa bokte. Institušuvnnat mat leat mielde šiehtadusas, leat deaŧalaš oassádallit dáidda- ja kultureallimii, ja ovddastit viiddis girjju kulturovdanbuktimiid dáfus.